Yateye ivi kuwa 14 Werurwe 2021, yambika impeta uwo yihebeye, nyuma y’iminsi 12 batangira ubuzima bwo kubana nk’umugabo n’umugore babana.

Kuwa 14 Werurwe 2021, Rurangwa Gaston ‘Skizzy’ yasabye Clemence ko babana akaramata, undi arikiriza ati “Yego”

Abanyarwanda baravuga ko umwana ari umugisha. Imvura y’umugisha yaguye kuri Skizzy n’umugore we Clemence, ubu ni ababyeyi b’umwana mwiza witwa Rurangwa Shema Lucas.

Rurangwa Gaston wamamaye mu itsinda ry’umuziki rya Kigali Boys (KGB), yibarutse imfura ye mu masaha ya saa kumi n’imwe, kuwa 23 Nyakanga 2021.

Ni umwe mu bagize uruhare mu kuzamura umuziki nyarwanda ari umunyamakuru kuri radiyo Voice of Africa, by’umwihariko mu kiganiro cya Top 30 Rwandan Flavor.

Skizzy yatangarije Popote.rw ko we n’umukunzi we bishimiye kwibaruka umwana w’umuhungu wavutse apima ibiro 3,2.

Ibyishimo ni byose mu rugo rwa Skizzy n’umugore we nyuma yo kwibaruka imfura yabo

Nyuma yo kubica bigacika muri KGB mu ndirimbo nka Arasharamye, Bibi, Uko tubigenza n’izindi, uyu musore ntakigaragara mu muziki ndetse hari abibaza ibyo ahugiyemo.

Kuri ubu, akora mu ruganda rwenga za Gatanu na Malt rukorera mu Nzove mu Karere ka Nyarugenge, ndavuga Skol Brewery Limited.

LEAVE A REPLY