Imibare mishya ya Minisiteri y’Ubuzima (MINISANTE) irerekana ko umubare w’abamaze guhitanwa na koronavirusi mu Rwanda ari 74.
Ni nyuma y’aho ejo ku Cyumweru tariki 27 Ukuboza 2020 hagaragaye abandi bantu 2 bishwe n’iyi ndwara imaze hafi umwaka ishegesha Isi muri rusange.
Mu Rwanda, mu bantu 1000 bandura koronavirusi, 9 ibakura mu mubare w’abazima. Abaturage bagirwa inama yo kubahiriza amabwiriza y’ubwirinzi bwayo.
Abamaze kwandura iyi ndwara mu Rwanda ni 7.970, abakize ni 6,289 bahwanye na 78,8% by’abanduye, ubariyemo 62 bakize ku munsi w’ejo.
Abahitanwe n’iki cyorezo ejo ni abasaza, umwe afite imyaka 96 mu gihe undi afite imyaka 61 nk’uko MINISANTE ibitangaza, aho yihanganishije imiryango yabo.
Iyi ndwara ntirabonerwa umuti, ariko Ishami ry’Umuryango w’Abibumbye ryita ku Buzima (WHO) rishishikariza abatuye Isi kwitabira gufata inkingo za Covid-19 kuko zabonetse.
