Clement Chiwaya wabaye Perezida w’Inteko Ishinga Amategeko wungirije wa Malawi kuva muri 2014-2019 ntakiriho nyuma yo kwirasira mu ngoro y’iyo nteko agahita apfa.
Mu butumwa yasize yanditse, asobanura ko yakorewe akarengane Inteko Ishinga Amategeko ikanga kumurenganura, akanzura kwiyambura ubuzima atyo.
Nyakwigendera Chiwaya yari umugabo ugendera mu kagare kubera ikibazo cy’imbasa yamuzengereje kuva akiri umwana w’imyaka 2 y’amavuko.
Amaze kuva mu nshingano z’ubuperezida mu Nteko Ishinga Amategeko, yashatse kugumana imodoka yari yarahawe imufasha kugenda nk’ufite ubumuga bw’amaguru.
Asobanura ko yishyuye amafaranga y’ikiguzi cy’iyo modoka, ariko agashinja Inteko kutamuha ibyangombwa byerekana ko ari iye, ibintu byakomeje kumutera agahinda.
Ibitangazamakuru byo muri Malawi biravuga ko Chiwaya yinjiye mu biro by’Inteko kuwa Kane tariki 30 Nzeri 2021 yirasa umukozi w’Inteko areba.
Mu rwandiko yasize yanditse, nyakwigendera yasobanuye ko yari amaze kurambirwa gukomeza kwingingira ibye, bityo yiyahura kugira ngo hatagira undi ababaza.
Chiwaya wavutse mu 1971, ni umugabo wari uzwi mu kuvuganira uburenganzira bw’abafite ubumuga, akaba yaratsinze amatora y’abadepite ubugira gatatu.
Igipolisi cya Malawi kiravuga ko cyatangiye gukora iperereza ku mpamvu yatumye Chiwaya yinjira mu ngoro y’Inteko afite imbunda irimo amasasu, kandi Ingoro irinzwe bikomeye.
Isooko: Peace FM Online
