Niba hari inkuru igezweho muri Uganda mu binyamakuru byandika amakuru y’imyidagaduro, ni iy’ikubitwa rya Sandra Teta wahindanyijwe isura.
Kuva ejo kuwa 28 Nyakanga, ku mbuga nkoranyambaga haracicikana ifoto ya Sandra Teta yabyimbaganye iminwa n’ibice bikikije amaso.
Bikavugwa ko Sandra yahondaguwe n’umuhanzi babyaranye abana babiri, babana nk’umugabo n’umugore nubwo batasezeranye mu mategeko.
Urubuga ekyoto.co.ug rwanditse ruti, “Musician Weasel turns wife into punching bag‘, ngo Umunyamuziki Weasel yahinduye umugore we agafuka yitorezaho gutera ingumi.
Abandi batangiye kwandika bibaza niba Weasel bitazarangira amukuyemo umwuka.
Isura ya Sandra Teta biragaragara ko yahindanye cyane ndetse iranabyimba mu buryo bukomeye, ariko arahakana ko yakubiswe n’umugabo we.
Mu butumwa yanyujije kuri Instagram, Teta yashimangiye ko yahohotewe n’amabandi atashye mu ijoro, ayo mabandi ngo ni yo yamudishye.
Gusa hari amakuru avuga Sandra yakubiswe n’umugabo we koko, ahubwo akamugirira akabanga kugira ngo atamwicira izina kandi ari se w’abana be.
Muri Gicurasi 2020 ni bwo Sandra yabyaye imfura ye Star Maria Mayanja, amubyarana na Weasel wo mu itsinda rya Good Lyfe.
Icyo gihe Ikinyamakuru Kigali Today cya hano mu Rwanda cyanditse ko uwo mwana ari uwa 21 kuri Weasel.
Nyuma y’umwaka n’amezi abiri, ni ukuvuga muri Nyakanga 2021, aba bombi babyaranye undi mwana w’umuhungu.
Sandra Teta yamamaye mu Rwanda ahanini uhereye muri 2011 ubwo yatorwaga nk’igisonga cya kabiri muri Miss SFB.
Yakomeje kuvugwa mu itangazamakuru kubera andi marushanwa y’ubwiza yitabiriye, ndetse anamamara nk’umukunzi w’umuhanzi Prince Kid.
Urukundo rwe na Prince Kid rwaje gushyirwaho akadomo, aza kugaragara mu munyenga w’urukundo n’umuhanzi Derek wo mu Itsinda rya Active, na we ibyabo birarangira.
Amaze igihe muri Uganda aho ategura ibitaramo mu tubari dutandukanye twaho dukomeye, cyane cyane utunyweramo Abanyarwanda benshi.
