Umuhanzi Master Fire ubusanzwe witwa Hakizimana Innocent, wamenyekanye kubera imyaka igera ku icyenda amaze yiga muri Kaminuza y’u Rwanda i Huye atararangiza, noneho yemeza ko Imana ibaho ndetse ko atakongera gukora indirimbo ihakana ko itariho.
Avuga ko nta muntu muzima wavuga ko Imana itabaho ko ibyo yigeze kuririmba
atari ukuri. Ati “Dieu existe kabisa (Imana iriho rwose). Vraiment Dieu existe.”
Uyu musore ufite amateka mu buhanzi nyarwanda cyane cyane ku babukoze
banyuze mu cyahoze ari Kaminuza Nkuru y’ u Rwanda, ni umwe mu bahanzi batangiye kuririmba kera, ariko akamenyekana mu mu mujyi wa Huye gusa.
Mu mwaka wa 2008 nibwo Master Fire yari yakoze indirimbo irimo interuro igira iti
“Dieu n’existe pas! C’est quoi? Espèce des imbeciles.“ Iyi ndirimbo ye ntiyakiriwe neza
mu bakunzi b’umuziki ariko Master Fire we yemezaga ko nayo izatuma arushaho
kumenyekana.
Muri iki cyumweru ubwo yaganiraga n’ikinyamakuru Izuba Rirashe, uyu musore
yatangaje ko ubu yemeza cyane ko Imana ibaho kandi ko nta muntu atazabibwira ko
ibaho.
Ati “Imana iriho rwose. Niyo iturinda, iradukunda, ni nayo imenya uko tubayeho. Imana iratuzi, nanjye iranzi, nawe irakuzi. Imana izi impamvu nkubu najyanwe i Wawa. Dieu existe Kabisa.”
Uyu muhanzi wari wajyanwe mu kigo ngororamuco kiri hagati mu Kiyaga cya
Kivu mu Kirwa cya Iwawa, akamarayo umwaka wose avuga ko yahindutse haba
mu myitwarire cyangwa mu mitekerereze.
Ati “Najyanwe i Wawa ari Kaminuza inyoherejeyo, kuko hari byinshi nashinjwaga ariko ndakubwira ukuri narahindutse pe. Wenda sinavuga ngo narahindutse 100% ariko mfite byinshi byahindutse.”
Abajijwe niba hari icyizere afite ko azasoza amasomo ye yo muri Kaminuza amazemo
imyaka 9 atararangiza kandi yiga muri Kaminuza ya Leta, Master Fire yavuze ko icyizere agifite kuko ngo ubu ari mu mwaka wa gatatu, akaba yumva kuba n’imyitwarire ye yarahindutse bimuha icyizere ko azarangiza.
Master Fire yatangiye kwiga muri Kaminuza Nkuru y’u Rwanda muri 2006,
yoherezwa na Kaminuza kujya kugororerwa i Wawa kuwa 5 Mata 2014.
Hakizimana Innocent uzwi nka Master Fire afite indirimbo 18, harimo 3 zifite
n’amashusho. Iyo aheruka gukora yitwa “Icyama” ikaba yarakozwe mu mwaka wa
2010, ari nayo aheruka gukora.
Master Fire yageze muri Kaminuza Nkuru y’u Rwanda muri 2006, muri 2009 yahagaritse amasomo imyaka 2, agaruka muri 2011, arongera ariga kugeza 2014 muri Mata , ubwo Kaminuza yamusubikishije umwaka wose ajyanwa i Wawa kugororwa.
Uyu mwaka wa 2015,Master Fire yiga muri Kaminuza y’u Rwanda icyahoze ari KIST mu mwaka wa gatatu, muri ‘Electronics and Electricity Engineering’.
Indirimbo ye yakunzwe cyane yitwa “Mtoto wa Kijiji”.
Yanditswe na Samuel Ngendahimana, itangazwa bwa mbere n’Izuba Rirashe.
