Abayizera Marie Grace wamamaye mu muziki nka Young Grace, yasobanuye byinshi byibazwa kuri we nyuma y’amezi umunani amaze yibarutse umukobwa we w’imfura yise Amata Anca Ae’eedah Ai.
Mu kiganiro yahaye IGIHE uyu muhanzikazi yavuze ko ubu yishimiye kuba umubyeyi kuko biryoshye kurusha ikindi kintu umuntu ashobora gutekereza.
Ati “Nishimira ububyeyi kuba umubyeyi biraryoshye, umwana araryoha sinzi igisobanuro naguha cyabikumvisha neza gusa ababyeyi bo babyumva, nishimira cyane ko umwana wanjye andyohera mu maso umunsi ku wundi.”
Avuga ko ibyishimo afite kubera umukobwa we atabona uburyo abisobanura, kuko anezerewe bikomeye ku bwe.
Mu minsi ishize uyu muraperikazi yagiye kwifotoreza ahantu yigeze kwifotoreza ubwo inda ye yari imvutsi, benshi bibaza impamvu yasubiyeyo ajyanye umwana we w’amezi umunani. Yavuze ko ari umuhigo yari afite.
Ati “Ntwite mpasohokera nkahifotoreza nasabye Imana mu mutima ko yamfasha nkazabyara neza nkabaho n’umwana akabaho ubundi tukazagarukana aha hantu, Imana yarabikoze rero nasubiyeyo ndayishimira cyane kubw’imirimo ikomeye n’ibitangaza yankoreye.”
Kuri uyu wa 8 Werurwe 2020, ubwo habaga Umunsi Mpuzamahanga wahariwe Abagore ku Isi yose. Umuraperikazi Young Grace yanditse amagambo maremare ku rukuta rwe rwa Instagram, agaragaza nyina nk’umuntu ukomeye kandi w’intwari wamubaye hafi kuva yavuka kugeza n’ubu akaba akimwitaho, anenga umusore babyaranye akitarutsa inshingano.
Mu gusobanura icyo yashakaga kuvuga yagize ati “Inshingano z’umubyeyi ntabwo ari bombon, chocolat, impano n’ibindi bifatika mubona kuko ibyo arabikora kandi cyane, hari icyo amufasha kuva akivuka kugeza n’ubu hari n’izindi nshingano umubyeyi wese aba asabwa rero izo nizo navugaga uranyemerera byo sindi bubijyemo cyane.”
Yavuze ko nyuma yo kwibaruka yihaye igihe kingana n’umwaka cyo kwita ku mwana we, akaba ateganya kugaruka wese mu muziki muri Kanama uyu mwaka ubwo umukobwa we azaba amaze kuzuza umwaka.
Gusa ngo hari indirimbo afite muri studio agenda akora gake kubera ubwinshi bw’abafana baba bamusaba indirimbo ndetse akaba ateganya kubaha imwe ku wa 1 Kamena 2020.
Uyu muhanzikazi ari gukora kuri album ye ya gatatu ndetse yateguje abantu kwitega byinshi mu muziki we.
Young Grace w’imyaka 26 yakundanaga n’umusore witwa Rwabuhihi Hubert [Piqué] wakinaga mu Ikipe ya Heroes FC yazamutse mu cyiciro cya Mbere mu 2019, banabyaranye umwana wavutse ku wa 24 Kanama 2019.
Gusa uyu mwana yavutse iby’urukundo rwabo byararangiye n’ubwo uyu musore yari yamwambitse impeta nk’aho bitegura kurushinga. Young Grace yibarutse badacana uwaka ku buryo umugabo ibyo kubyara k’uwari umukunzi we nawe yabibonye mu itangazamakuru nk’abandi bose.
Isooko: Igihe
