Ku wa Gatanu, Musanze FC yasinyishije abakinnyi bane bashya barimo Ndizeye Innocent wakiniraga Mukura Victory Sports mu gihe yamaze kumvikana n’abarimo uwari rutahizamu wa Espoir FC, Kyambadde Fred.
Mu ijoro ryakeye nibwo ubuyobozi bwa Musanze FC bwicaranye n’abakinnyi bose buteganya gukoresha mu mwaka utaha w’imikino ubwo iyi kipe izaba itozwa na Seninga Innocent.
Abakinnyi baraye bumvikanye n’ikipe bagashyira umukono ku masezerano barimo Ndizeye Innocent ‘Kigeme’ wari umaze imyaka ibiri muri Mukura Victory nyuma yo kuva mu Amagaju FC, akaba akina hagati mu kibuga ku ruhande rw’iburyo.
Kigeme yahawe amasezerano y’imyaka ibiri kimwe na rutahizamu Munyeshaka Gilbert wakiniraga Heroes FC ndetse na Niyonshuti Gad ‘Evra’ ukina inyuma ibumoso, we akaba yavuye muri Sunrise FC.
Umunya-Nigeria Samson Okwecuku wakiniye Bugesera FC, Umugande Kyambadde Fred wakiniraga Espoir FC n’umunyezamu Ntaribi Steven wakiniraga Gorilla FC yo mu cyiciro cya kabiri, bose baraye bumvikanye n’ubuyobozi ariko bazabanza kuzana impapuro zibakura mu makipe yabo.
Uretse aba bakinnyi bashya, Musanze FC yongereye amasezerano y’imyaka ibiri Dushimumugenzi Jean, Habyarimana Eugène na Moussa Ally Sova wari usigaje umwaka umwe, ariko akaba yemeye kongezwa undi.
Abakinnyi basoje amasezerano muri Musanze FC, batazongerwa, barimo Maombi Jean Pierre, Nduwayezu Jean Paul ‘Chouchou’, Jean Didier Touya, Gabiro Jean Claude na Mugenzi Cédric ‘Ramires’.
Abari bagifite amasezerano basezerewe ni Abanya-Nigeria; Ernest Adeola na Okwecuku Okay bari basigaranye imyaka ibiri y’amasezerano nyuma yo kumara umwe kimwe n’umunyezamu Muhawenayo Gad.
Peter Otema wakiniraga Bugesera FC mu mwaka ushize w’imikino, yifuza kugaruka muri Musanze FC yarimo mu mwaka w’imikino wa 2017/18, akayikinira aniga gutoza.
Umunyezamu Ntaribi Steven wakiniye APR FC na Police FC ubu akaba yari muri Gorilla FC, na we yamaze kumvikana na Musanze FC
Isooko: Igihe
