Haracyari kare kwemeza ko Donald Trump aza gutsindwa amatora, gusa amahirwe menshi yo kwegukana insinzi ari kwa mukeba we Joe Biden.
Trump aramutse atsinzwe, si we perezida wa mbere wa Leta zunze Ubumwe z’Amerika waba atsinzwe amatora ashaka manda ya kabiri, ariko ni we wa mbere mu myaka 30 ishize.
Uwashaka yavuga ko yaba abaye uwa gatanu mu myaka 100 ishize, nk’uko amateka y’iki gihugu cy’igihangange ku Isi abigaragaza.
Pascal Lissouba wayoboye Congo Brazaville kuva mu 1992-1997, yigeze kuvuga ati, “On organize pas les elections pour les perdre”, ati ntabwo umuntu ategura amatora kugira ngo ayatsindwe.
Iyi mvugo yamamaye hose, igakoreshwa mu kumvikanisha ko Perezida uri ku butegetsi aba afite amayeri menshi yamufasha kongera gutorwa aramutse yiyamamaje.
Muri Amerika, tugiye kurebera hamwe abaperezida biyamamaje bashaka manda ya kabiri bagakubitwa inshuro, bagatanga ibyicaro muri White House bimyiza imoso.
Reka duhere ku babayeho mu bihe bya vuba, turabara dusubira inyuma ku babayeho kera mu myaka isaga 200 ishize kuva Leta zunze Ubumwe z’Amerika zibonye ubwigenge.
- George Herbert Walker Bush
Ku mwanya wa mbere hari, George Herbert Walker Bush, cyangwa Bush mukuru. Uyu yayoboye Amerika kuva mu 1989-93. Yashatse manda ya kabiri abaturage bamureba ikijisho, bagahundagaza amajwi kuri Bill Clinton.
Ni nyuma y’aho imyaka y’ubuyobozi ye yaranzwe n’imanuka ry’ubukungu ndetse no gucumbagira kwa politiki y’ububanyi n’amahanga y’Amerika nyuma y’Intambara y’Ubutita.
Nubwo atabashije gutsinda amatora, umwana we George Walker Bush yamukuye mu isoni mu mwaka wa 2000, atsinda amatora ku itike y’aba Democrats.
Bush mukuru na Bush muto bahise bandika amateka yo kuba umugabo n’umwana we bayoboye Amerika, ariko baza ku mwanya wa kabiri nyuma ya John Adams n’imfura ye John Quincy Adams na bo bayoboye iki gihugu. Turabagarukaho dusoza iyi nkuru.
Undi mwana wa Bush witwa Jeb Bush, na we yiyamamaje mu matora yo muri 2016 ashaka guhagararira Aba-Republican mu matora ya Perezida. Ntibyamuhiriye ariko.
Uyu mugabo wayoboye Leta ya Florida kuva mu 1999-2007 ni murumuna wa George Walker Bush.
- Jimmy Carter
Ku mwanya wa Kabiri mu baperezida b’Amerika batsinzwe amatora bashaka manda ya kabiri, tuhafite Jimmy Carter wayoboye Amerika kuva 1977-1981.
Abaturage bamwimye manda ya kabiri mu matora yo mu 1980, bitorera mukeba we Ronald Reagan bitewe ahanini no kuba ku buyobozi bwe ubukungu bwarifashe nabi.
Ni mu gihe Iran cyari cyanafashe bugwate abakozi b’Ambasade y’Amerika.
Umunsi Carter yavuye muri White House, Iran yarekuye Abanyamerika 52.
Jimmy Carter ni we Perezida wa Mbere Amerika yagize watowe ashaje kurusha abandi, aho yari afite imyaka 69, kugeza ubwo Donald Trump yatorwaga afite imyaka 70.
- Gerald Ford
Uwo Carter yari yarasimbuye, Gerald Ford (1974-1977) na we yimwe manda ya kabiri. We yari yaragiye ku butegetsi nyuma ya Richard Nixon weguye.
Inzibacyuho irangiye, Gerald Ford yariyamamaje abaturage ntibamutora ahanini kubera imbabazi yahaye Nixon no kuba Abanyamerika baratsinzwe muri Vietnam.
Uyu munsi Vietnam ni igihugu cyanditse mu mateka ko cyatsinze Abanyamerika, nubwo filime za Hollywood zigaragaza ingabo za Vietnam nk’abasirikari badashoboye.
Gerald Ford wabanje kuba Visi-Perezida wa Richard Nixon, ni we Perezida w’Amerika wayoboye igihe gito mu baperezida batapfiriye ku butegetsi, aho yayoboye iminsi 895.
- Herbert Hoover
Ku mwanya wa Gatanu tuhafite Hebert Hoover wayoboye Amerika kuva mu 1929-1933. Na we yatahiye manda imwe. Irindimuka ry’ubukungu (Great Depression ryo mu 1929) ryabaye ku ngoma ye. Abaturage bamwimye manda ya kabiri bitorera Franklin D. Roosevelt wayoboye manda eshatu zikurikiranye (1933-1945).
- William Howard Taft
Undi wayoboye manda imwe ni William Howard Taft (1908-1912). Mu matora yo gushaka manda ya kabiri, ishyaka rya Republican ryacitsemo ibice, aho Theodore Roosevelt yashinze ishyaka aryita Progressive Party yiyamamaza ku itike yaryo. Byatumye Umudemocrat Woodrow Wilson abahigika bombi.
- Benjamin Harrison
Ku mwanya wa Karindwi hari Benjamin Harrison (1889-1893). Na we yagerageje gushaka manda ya kabiri ntibyamuhira. Leta ye yanenzwe gusesagura umutungo wa rubanda, bituma abaturage bamwima amajwi, batora Grover Cleveland yari yarasimbuye ku butegetsi akongera kwiyamamaza.
- Martin Buren
Ku mwanya wa munani hari Martin Buren (1837-1841) yayoboye Amerika mu bihe by’ubukungu butifashe neza, aho amabanki n’izindi bizinesi nyinshi byahombye. Ishyaka rye ry’Abademocrat ryarakaje abarwanashyaka benshi icyo gihe, Abaturage bamwima manda ya kabiri, batora William Harrison wo muri Whig Party.
- John Quincy Adams
Ku mwanya wa cyenda hari John Quincy Adams (1825-1829). Uyu na we yayoboye manda imwe. Imishinga ye myinshi yasubizwaga inyuma na Congress, ishyaka rye rya Democratic Republican Party ricikamo ibice 2: National Republican Party na Democratic Party. Yabuze manda ya kabiri, hatorwa umudemocrat Andrew Jackson.
- John Adams
Uwa 10 wimwe manda ya kabiri, ari na we wabimburiye abandi, ni John Adams, se wa John Quincy Adams. John Adams ni we Perezida wa kabiri Amerika yagize nyuma ya George Washington, ariko akaba ari we Perezida wa mbere wabaye muri White House. Yashinjwe icyenewabo, yimwa manda ya kabiri, hatorwa Thomas Jefferson.
Byakusanyijwe na Janvier Popote.
