Abana bato babarirwa muri 200 bamaze gupfira mu bitaro mu Ntara ya Tigray iherereye mu Majyaruguru ya Ethiopia, kubera akavuyo kamaze umwaka mu Ihembe ry’Afurika.
Ni imibare yakusanyijwe mu bitaro 14 muri iyi ntara ifite ikibazo cyo kuba itumanaho ryarahagaritswe kubera ubushyamirane buri hagati ya Leta n’abarwanyi ba TPLF.
Abashinzwe ubuzima muri Tigray babasha gutanga serivisi muri 1/2 cy’iyi ntara, ahandi hose abahatuye ntibabona ubufasha ubwo ari bwo bwose buturutse mu buyobozi.
Tigray hafi ya yose iri mu maboko y’abarwanyi ba TPLF (Tigray People’s Liberation Front) bayobowe na Debretsio Gebremichael barajwe ishinga no guhirika Leta ya Ahmed Abiy.
Minisitiri w’Intebe wa Ethiopia, Ahmed Abiy na Leta ye bafata TPLF nk’umutwe w’iterabwoba ndetse aherutse gusaba abaturage bose guhaguruka bakawurwanya.
Dr Godefay Hagos wari ukuriye Ishami ry’Ubuzima muri Leta ya mbere y’intambara, avuga ko abana bari munsi y’imyaka 5 basaga 186 bamaze gupfa bazira imirire mibi.
Ingano y’abana bato nk’abo bafite imirire mibi muri Tigray ni 29%, mu gihe mbere y’Intambara umwaka ushize bari 9%.
Mu ngo zakozweho ubushakashatsi, 14% ni zo byagaragaye ko zifite amafunguro, mu gihe mbere y’intambara zari 60%, nk’uko Hagos abitangaza.
Ni imibare yakusanyijwe mu bice abashinzwe ubuzima babasha kugeramo, Hagos avuga ko ibibera mu bice batabashije kugeramo bishobora kuba byikubye kabiri.
Ahmed Abiy yohereje ingabo muri Tigray mu Gushyingo 2021 ngo zijye guhirika ubutegetsi bwa TPLF buyobora Tigray, ashinja ingabo za TPLF kugaba ibitero ku za Addis Ababa.
Uyu mugabo wahawe igihembo cyitiriwe Nobel mu mwaka wa 2019 yijeje ko intsinzi izaboneka vuba cyane, ariko birangira TPLF yisubije ibice yari yambuwe.
Si ibyo gusa kuko nyuma yo kwigarurira Umurwa Mukuru wa Tigray, Mekelle, ingabo za Debretsio Gebremichael zambutse imipaka ya Tigray zitera zigana mu Majyepfo.
Kuva muri Nyakanga hagati uyu mwaka, 15% by’imfashanyo zigenewe Tigray ni zo gusa zinjiye muri iyi ntara, nk’uko bitangazwa n’Umuryango w’Abibumbye.
Ibiro Ntaramakuru by’u Bufaransa AFP, byatangaje ko kubera inzara idasanzwe iri muri Tigray, ababyeyi bahira ibyatsi bakabigaburira abana ngo badapfa.
Imibare yakusanyijwe kuva muri Kamena-Ukwakira 2021, yerekana ko mu bitaro 14 bisigaye bikora muri Tigray, hapfa abana 3-4 buri cyumweru muri buri bitaro.
Bahitanwa n’indwara ubusanzwe zivurwa zigakira mu buryo butagoranye zirimo umusonga n’impiswi, ariko ubu ibintu byadogereye kubera ingaruka z’imirwano y’abapfa ubutegetsi.
Hagos avuga ko hari ikindi cyiciro cy’abantu bazahaye, barimo ibihumbi 55 by’abarwayi ba Sida, n’abandi barwaye indwara nka kanseri, diyabete n’umuvuduko w’amaraso.
Minisitiri w’Intebe Ahmed Abiy avuga ko ibyo kuba ubufasha bwa kiganga budatangwa muri Tigray byabazwa umutwe wa TPLF wagabye ibitero mu bice bya Amhara na Afar.
Gusa Leta zunze Ubumwe z’Amerika zivuga ko inzitizi ikomeye ari Leta ya Ahmed Abiy ituma imfashanyo zigenewe abazahajwe n’intambara zitabageraho.
Abashinzwe gutanga ubufasha bw’ubuvuzi bavuze ko Leta ya Ahmed Abiy ari yo ibananiza.
Hagos avuga ko nta gifatika abatanga ubufasha mu buvuzi bakora mu gihe muri Tigray amabanki adakora ndetse ububiko bw’imfashanyo bukaba burimo ubusa.
Avuga ko abo bakozi bemeye no gukora badahabwa imishahara ariko bakaba badafite n’amafunguro.
TPLF ni umutwe washinzwe muri 1975, uza gufata ubutegetsi mu 1991, uyobora Ethiopia kuva ubwo kugeza muri 2018.
Kuwa 18 Mutarama 2021, Komisiyo y’Amatora ya Ethiopia yandukuye iri shyaka irishinja kubangamira Repubulika ya Ethiopia, ngo byakozwe n’abayobozi bayo bateje akavuyo.
Kuwa 6 Gicurasi 2021, abagize Inteko Ishinga Amategeko ya Ethiopia baricaye bafata umwanzuro wo kwita TPLF umutwe w’Iterabwoba.
Mbere y’uko ibi biba, twabibutsa ko muri 2019 Ahmed Abiy yahurije imitwe ya politiki itandukanye mu ishyaka rye rya Prosperity Party, ariko TPLF yanga kuryiyungaho.
TPLF yari yarayoboye igihugu imyaka 27, yatangaje ko Ahmed Abiy atemewe n’amategeko nyuma y’aho amatora yari ateganyijwe muri Nzeri 2020 ayimuriye muri 2021.
Ahmed Abiy yatangaje uwo mwanzuro atanga impamvu z’ubwiyongere bw’ubwandu bwa Covid-19, TPLF ntiyabikozwa ndetse yo ihita ikoresha amatora muri Tigray.
Ibyavuye muri ayo matora yo muri Tigray byamaganwe na Leta ya Ahmed Abiy wahise yiyambaza imirwano ngo ayateshe agaciro anakureho ubutegetsi bwa TPLF.
Debretsio Gebremichael uyobora TPLF ariko, si agafu k’imvugwarimwe. Kumushyira ku gatebe bikomeje kuba nko kwasa ingiga y’igiti y’insobe.
