Gatabazi Jean Marie Vianney yasabye imbabazi nyuma y’aho akuwe ku mwanya wa Guverineri w’Intara y’Amajyaruguru kubera ibyo akurikiranweho bitaratangazwa.
Gatabazi wayoboraga iyi Ntara kuva muri Kanama 2017, yanditse ku rukuta rwe rwa Twitter ko asaba imbabazi Perezida Kagame, Umuryango FPR Inkotanyi uyoboye igihugu abereye n’umunyamuryango, asaba imbabazi n’Abanyarwanda.
Yagize ati, “Ndasaba imbabazi aho naba naragutengushye wowe, Nyakubahwa Paul Kagame, RPF-Inkotanyi n’abaturage b’u Rwanda.”
Yavuze ko mu buzima bwe buri imbere yiteguye gukomeza gukorera igihugu cye uko ashoboye kose, kandi ngo azakomeza akore ibyifuzwa na Perezida Kagame na FPR.
I apologize for any and all disappointment to You, Excellency @PaulKagame , @rpfinkotanyi and the people of Rwanda, and I look forward to the next chapter of my life continuing to serve my country to my best ability and always loyal to the You Excellency President and RPF! 2/2
— Gatabazi JMV (@gatjmv) May 26, 2020
Yashimye Perezida Kagame ku cyizere yamugiriye akamushinga kuyobora Intara y’Amajyaruguru mu gihe cy’imyaka 2 n’amezi 9, ashima kandi abaturage b’Intara y’Amajyaruguru bamushyigikiye mu ishyirwa mu bikorwa rya gahunda z’iterambere.
I am so grateful to HE @PaulKagame for the trust and privilege to serve as Governor of the North for the last two years&9months, and also grateful to the people of the North for great collaboration and achievements over the last few years.1/2
— Gatabazi JMV (@gatjmv) May 26, 2020
Usibye Gatabazi, CG Gasana Emmanuel wayoboraga Intara y’Amajyepfo wanabaye Umuyobozi Mukuru wa Polisi, na we yahagaritswe ku mirimo ye.
Ibaruwa ihagarika aba bayobozi bombi yasinywe na Minisitiri w’Intebe, Dr Edouard Ngirente, mu izina rya Perezida Kagame, itangazwa kuwa 25 Gicurasi 2020.
Bamwe mu bantu ibihumbi 41,7 bakurikira Gatabazi kuri Twitter bagaragaje uko bakiriye ihagarikwa rye, bamushimira ibyo yagejeje ku Ntara y’Amajyaruguru, abandi bamubwira ko niba hari ibyo yakoze nabi akwiye kubisobanura.
Yanditswe na Janvier Popote.
