Min. Busingye yijeje gukemura ikibazo cy’abaraswa n’abashinzwe umutekano

Minisitiri w’Ubutabera, Johnston Busingye yavuze ko “gukoresha ingufu z’umurengera cyangwa zica ku mfungwa/abakekwa” bidakwiye, ko bigomba guhagarara.

Hashize imyaka myinshi Polisi y’Igihugu itangaza amakuru y’iraswa ry’abo yataye muri yombi, igasobanura ko barashwe bagerageza gutoroka cyangwa kurwanya ababarinze.

Urwego rw’Igihugu rushinzwe imfungwa n’abagororwa na rwo, aya makuru akunze kuruvugwaho, aho abafungwa n’abagorora baraswa “bagerageza gutoroka”.

Ku mbuga nkoranyambaga no mu itangazamakuru, humvikana amajwi akemanga isobanurampamvu yo kuba abaraswa baba bageragezaga gutoroka.

Bishingira ahanini ku kuba bamwe mu baraswa baba bambaye amapingu, hakibazwa uburyo umuntu wambaye amapingu yakwiruka agasiga ushinzwe umutekano.

Abandi bibaza impamvu ugerageje gutoroka ataraswa ahandi hatari mu cyico.

Minisitiri w’Ubutebara, Johnston Busingye avuga ko ikoreshwa ry’ingufu z’umurengera ku bakekwaho ibyaha ritemewe n’amategeko.

Mu butumwa yanyujije kuri Twitter, yavuze ko Minisiteri y’Ubutabera iza gukorana na Polisi y’Igihugu n’inzego bireba “iki kibazo gikemuke binyuze muri politike n’imikorere.

Muri iyo mikoranire kandi, Busingye avuga ko hagomba “gukaza kubibazwa kw’ababikora (abarasa), amahugurwa no gukaza ubugenzuzi.”

Ubu butumwa bwa Minisitiri Busingye bwakiriwe neza n’abamukurikira kuri Twitter, bashimangira ko abapolisi n’abacungagereza barasa abakekwaho ibyaha cyangwa abo byahamye bakwiye kujya bagezwa imbere y’ubutabera, ntihavugwe ko uwarashwe yashakaga gutoroka cyangwa ko yarwanyije abashinzwe umutekano kandi nta kibyemeza.

Gukoresha ingufu z'umurengera cg zica ku mfungwa/abakekwa ntibyemewe n'amategeko kandi ntibikwiye.

Turakorana na @Rwandapolice n'inzego bireba iki kibazo gikemuke binyuze muri politike n'imikorere, gukaza kubibazwa kw'ababikora, amahugurwa nogukaza ubugenzuzi.

— Busingye Johnston (@BusingyeJohns) September 5, 2020

Abaherutse kuraswa

• Polisi y’igihugu ikorera mu karere ka Ngoma yasuzumaga ishyirwa mu bikorwa ry’amabwiriza yo kwirinda Covid-19, yarashe umusore witwa Nsengiyumva Evariste wari utuye mu Murenge wa Zaza wafatiwe mu kabari n’abandi bantu bari kunywa inzoga barenze ku mabwiriza yo kwirinda COVID-19 arimo n’ayo gutaha saa Moya, “agashaka kuyirwanya.” 

*Nyuma y’uru rupfu, Polisi y’Igihugu yatangaje ko yataye muri yombi umupolisi wakoze aya mahano.

• Umugabo witwa Zigirinshuti Alexis w’imyaka 31 wari utuye mu Karere ka Gatsibo,mu Murenge wa Murambi, yarashwe na polisi “agerageza kuyirwanya” nyuma y’aho abapolisi bari bagiye kumufata kubera ibyaha akurikiranyweho birimo iby’ubwicanyi no gucuruza ibiyobyabwenge. Urupfu rwe rwamenyekanye kuwa 28 Nyakanga 2020. Uyu mugabo yarashwe ku gicamunsi cyo ku wa 27 Nyakanga ngo yafatanyaga n’agatsiko kiyise ‘imparata’ gucuruza ibiyobyabwenge. Nk’uko Polisi ibitangaza, yari amaze iminsi yihishahisha nyuma y’uruhare yagize mu kugerageza kwica uwamutanzeho amakuru ko acuruza ibiyobyabwenge. 

• Urwego rw’Igihugu rw’Ubugenzacyaha, RIB, kuwa 1 Kanama 2020 rwatangaje ko umusore w’imyaka 25 witwa David Shukuru Mbuyi ukomoka muri Repubulika Iharanira Demokarasi ya Congo, yarashwe “agerageza gutoroka” Station ya Polisi ya Nyarugunga mu Mujyi wa Kigali aho yari afungiye akekwaho ibyaha birimo iby’icuruzwa ry’abantu. Uyu musore yakekwagaho ibyaha birimo ibyo gukoresha imibonano mpuzabitsina no gucuruza abantu. Itabwa muri yombi rye, rifitanye isano n’abakobwa bane baherutse kwerekwa itangazamakuru bashinjwa gutangaza amashusho y’urukozasoni binyuze kuri internet

• Umuvugizi wa Polisi y’u Rwanda CP John Bosco Kabera, kuwa 28 Nyakanga 2020 yatangaje ko umwe mu bakekwaho kwica umumotari bakamwambura moto mu Karere ka Muhanga uzwi ku izina rya Munyu yarashwe agapfa agerageza gucika inzego z’umutekano. Byabereye mu Karere ka Muhanga mu Murenge wa Rugendabari mu Kagari ka Gasave, ku wa 26 Nyakanga 2020, mu masaha ya saa sita z’amanywa, ubwo Ndayisaba Eric bita Munyu yajyanaga n’inzego z’umutekano kwerekana mugenzi we bita Gasumuni bakekanwa ubufatanyacyaha mu kwica umumotari witwa Ndirabika Samson.Umuvugizi wa Polisi y’Igihugu yemeje amakuru y’uko Ndayisaba Eric bitaga Munyu yarashwe bikamuviramo urupfu, ubwo yageraga hafi y’aho avuga mugenzi we yihishe akava mu modoka ya polisi yari imutwaye akiruka ari na bwo yaraswaga.

• Umusore w’imyaka 24 y’amavuko witwa Gasasira Félix ukekwaho kwiba mudasobwa mu Kigo cy’ishuri mu Karere ka Huye yarashwe na Polisi arapfa ubwo yashakaga kuyirwanya no kuyicika. Urupfu rwe rwamenyekanye kuwa 24 Ukuboza 2019. Umunyamabanga Nshingwabikorwa w’Umurenge wa Tumba, Migabo Vital, yavuze ko uwo musore yari yafashwe ashaka kurwanya Polisi no gutoroka ubwo yari agiye kwerekana abandi bafatanyije kwiba. 

• Kuwa 10 Kanama 2020 Polisi y’u Rwanda yatangaje ko yarashe ku bantu babiri bari bafungiye kuri Sitasiyo ya Ndera mu Karere ka Gasabo bashakaga gutoroka, umwe agahita yitaba Imana. Abo ni Ndahimana Dominique w’imyaka 30 wari ufunze akekwaho gucuruza ibiyobyabwenge, akaba ari na we wahise apfa, ndetse na Niyigena jean Claude w’imyaka 32 wari ufunzwe akekwaho ubujura, we akaba yakomeje gucika akaba agishakishwa.  

Mu mwaka wa 2018, hatorotse abagororwa 46, muri bo batanu bararaswa barapfa, nk’uko byatangajwe n’Umuyobozi w’Urwego rw’Igihugu rushinzwe Imfungwa n’Abagororwa, CG Rwigamba George.

Umwaka ushize, Uwizeyimana Evode wari Umunyamabanga wa Leta ushizwe Itegeko Nshinga n’andi mategeko, yanenze ababangamira inzego zishinzwe umutekano mu kazi bakagerageza kuzirwanya cyangwa gutoroka nyuma yo gutabwa muri yombi, bigatuma baraswa bikabaviramo urupfu. Muri iki kiganiro, aragaruka ku buryo bwo gufungira umuntu iwe hakoreshejwe ikoranabuhanga.