Minisiteri y’Ubuzima (MINISANTE) yemeje urupfu rw’Umunyarwanda wa mbere wahitanwe na COVID-19 kuva iki cyorezo kigaragaye mu Rwanda kuwa 14 Werurwe.
Uwapfuye ni umushoferi w’igikamyo wabaga mu gihugu cy’abaturanyi kitatangajwe izina, wabonye arwaye aza mu Rwanda, abaganga bamwitaho ariko birangira apfuye.
Ejo kuwa 30 Gicurasi, mu Rwanda hagaragaye abarwayi bane bashya ba COVID-19, hakira abarwayi batatu, ndetse hatangazwa n’uwo umwe witabye Imana.
Muri rusange, umubare w’abamaze kugaragaraho Coronavirus mu Rwanda ni abantu 359, muri bo abakize (250) ni benshi kurusha abakirwaye (108).
30.05.2020 – Covid-19 Coronavirus
Amakuru Mashya | Update | Mise à Jour*Abarwayi bashya bose bahise bashyirwa mu kato bakihagera
*All new cases were isolated upon arrival
*Tous les nouveaux cas ont été mis en isolement à leur arrivée pic.twitter.com/yQJkbKVjPk— Ministry of Health | Rwanda (@RwandaHealth) May 30, 2020
Urupfu rw’uyu mushoferi w’igikamyo rutangajwe mu gihe Leta yari imaze kwemerera ibikorwa byinshi gusubukurwa, ndetse kuwa 1 Kamena ingendo zihuza intara zizafungurwa.
Kuri iyo tariki kandi, biteganyijwe ko abamotari basubira mu muhanda bagatwara abantu, kuva ubucuruzi bwabo buhagaritswe kuwa 21 Werurwe.
Nubwo serivisi nyinshi zari zahagaritswe zimaze gufungurwa, abaturage basabwa gukomeza kubahiriza ingamba z’ubwirinzi zirimo gukaraba intoki no kwambara udupfukamunwa.
COVID-19 yagaragaye bwa mbere mu Bushinwa mu mpera z’umwaka ushize, ikwirakwira ku Isi n’umuvuduko udasanzwe, kuri ubu abamaze kuyandura ni 6,161,485.
Muri bo, iki cyorezo kimaze guhitana abantu 371,016, mu gihe abakivuwe bagakira ari 2,738,333, naho abakirwaye bakaba ari 3,052,136.
Yanditswe na Janvier Popote
