Ikigo cy’igihugu cy’ubuzima (RBC), cyatangaje ko u Rwanda rumaze kugira ubushobozi buhagije bwo gupima Coronavirus, aho ubu imashini zisanzwe zipima virusi itera Sida, zigiye kwifashishwa mu gupima iki cyorezo.
Umuyobozi Mukuru wa RBC, Dr Sabin Nsanzimana, yavuze ko mu minsi iri imbere hagiye kujya hifashishwa imashini zisanzwe zifashishwa mu gupima virus itera Sida, zikazitabazwa mu gupima Coronavirus kugira ngo umubare w’abapimwa icyo cyorezo wiyongere ndetse iyo serivisi irusheho kwegera abaturage.
Ati “Tumaze icyumweru kirenga dupima abantu barenze 1000, tukaba tunifuza ndetse no kurenza iyo mibare. Turi gutegura ko n’izindi mashini zari zisanzwe zipima nka VIH [virusi itera Sida], zitangira kwifashishwa mu gupima Coronavirus, ziri mu ntara zitandukanye. Ibyo nabyo biri vuba”.
Dr Nsanzimana avuga imashini zari muri Laboratwari u Rwanda rwatangiranye zikubye inshuro zirenga ebyiri ariko n’abakeneye gupimwa nabo biyongera umunsi ku wundi.
Ati “Twatangiye dupima abantu bafite ibimenyetso, tugeraho dupima umuntu wese wahuye n’ufite uburwayi, tugera aho tunatekereza ngo ariko iki cyiciro nacyo uwagipima, ubu noneho dufite umukoro w’uko tuzajya dupima benshi bashoboka uko ubushobozi bwiyongera”.
Kugeza kuri uyu wa Kabiri mu Rwanda hari hamaze gufatwa ibipimo bikabakaba ibihumbi 36 aho abagera kuri 261 ari bo basanzwemo icyorezo cya Coronavirus. Umubare w’abamaze gukira ni 129, abagera ku 132 baracyari kwitabwaho n’abaganga mu ghe ntawe urahitanwa n’iki cyorezo mu Rwanda.
RBC itangaza kandi ko hari no gutegurwa uburyo bwunganira ibindi bigo nk’icya Kanyinya n’icya Nyamata, byakira abarwayi ba Coronavirus, mu gihe baramuka biyongereye.
Ku wa 14 Werurwe 2020 nibwo u Rwanda rwemeje ko umurwayi wa Mbere wa Coronavirus yageze mu gihugu, yari Umuhinde wari uturutse mu Mujyi wa Mumbai.
Imibare ya Minisiteri y’Ubuzima igaragaza ko kugeza kuri uyu wa Mbere hari hamaze gufatwa ibipimo 35 096; aho abamaze gutahurwaho ubwandu baherereye mu turere 13 tw’u Rwanda, bivuze ko hari utundi 17 tutarageramo icyorezo cya COVID-19 iterwa n’agakoko gashya ka Coronavirus.
Ahamaze gutahurwa ubwandu bwinshi ni mu Karere ka Kirehe hagaragaye abantu 101 banduye Coronavirus, hagakurikiraho aka Bugesera gafite 47, Gasabo ifite 39, Kicukiro na 38 na Nyarugenge ifite 25.
Mu bantu bose banduye, abaturukanye Coronavirus hanze ni 169, naho 92 bahuye n’abavuye hanze baranduye. Mu banduye bose hamwe, abagabo ni 206 bangana na 78.93 ku ijana, abagore ni 55, bangana na 21.07%.
