Minisitiri w’Intebe w’u Bwongereza, Boris Johnson yashyize abaturage be mu bihe bisanzwe nk’uko byahoze mbere y’umwaduko wa Covid-19; ntibikiri itegeko kwirinda.
Umubare w’abandura wo wakomeje kwiyongera, ni ihurizo kuri Boris witeze ko gukuraho amabwiriza yo kwirinda Covid-19 bitanga umusaruro ushimishije ku benegihugu.
Abongereza bakuze, hafi ya bose bamaze gufata inkingo za Covid-19. Byagabanyije umubare w’abari basanganwe izindi ndwara bahuhurwa n’iki cyorezo.
Abongereza bemerewe kubaho batirinda Covid-19 nyuma y’aho iki gihugu cyo ku Mugabane w’u Burayi gipfushije abantu ibihumbi 128 bazize Covid-19.
Inkingo ziratanga icyizere cy’uko uwakingiwe atazahazwa na koronavirusi iyo yanduye; byumvikane neza ko gufata urukingo bitakubuza kwandura.
Amabwiriza yo kwirinda Covid-19 yakuweho kuri uyu wa Mbere. Ntibikiri itegeko kwambara agapfukamunwa, nta mubare ntarengwa w’abishimisha mu bitaramo.
Ntibikiri itegeko guhana intera, keretse ku bantu barwaye Covid-19, nk’uko bitangazwa na CNN dukesha iyi nkuru.
Ibibuga by’indege, utubyiniro n’inzu z’imyidagaduro tutibagiwe na sitade byemerewe kwakira abantu bose bifitiye ubushobozi.
Saa sita z’ijoro ryakeye, ari bwo Umunsi wo kuwa Mbere watangiye, Abongereza biraye mu tubyiniro nk’uko byari bimeze kugeza muri Werurwe 2020 ubwo hashyirwagaho ingamba zidasanzwe zo kwirinda Covid-19.
Ubu ntibikiri ngombwa kwerekana icyemezo cyerekana ko utanduye mbere yo kwinjira ahahurira abantu benshi; hari abategereje kureba niba ibi bidasubiza u Bwongereza mu icuraburindi.
Hagati aho hari uburyo bw’ikoranabuhanga (app) bufasha umuntu kumenya niba yanduye Covid-19. Uwanduye ategetswe kwishyira mu kato kugeza kuwa 16 Kanama ubwo abafashe doze ebyiri z’urukingo bazaba bemerewe kwitwara uko bashaka.
Iyo app izwi nka ‘NHS Covid-19’ ni iy’ikigo cya NHS (National Health Service), iki ni ikigo cya Leta gitanga serivisi z’ubuzima mu Bwongereza (England), kikaba kimwe mu bigo by’ubuzima bine by’Ubwami bw’u Bwongereza (United Kingdom, UK).
Mu gihe abanduye Covid-19 bakomeza kwiyongera mu Bwongereza, umubare w’abantu babwirwa n’iriya app ko bagomba kwishyira mu kato na wo uriyongera cyane.
Mu cyumweru cyarangiye kuwa 7 Nyakanga, abantu ibihumbi 520 bahawe ubutumwa n’iriya app bubamenyesha ko bakwiye kwishyira mu kato.
Minisitiri w’Intebe Boris Johnson na we yahawe ubwo butumwa. We n’undi munyepolitiki uzwi nka Rishi Sunak babwiye ko bakwiye kwishyira mu kato nyuma yo guhura n’Umunyamabanga wa Leta ushinzwe Ubuzima Sajid Javid wipimishije Covid-19 akayisanganwa kuwa Gatandatu w’icyumweru gishize.
Gukuraho ingamba zo kwirinda Covid-19 kuri Boris Johnson, hari ababifashe nk’urusimbi; kandi si rwo rwa mbere yaba akinnye kuva Covid-19 itangiye kuyogoza iki gihugu.
Muribuka ko kuwa 2 Ukuboza yakuye abaturage muri Guma mu Rugo abizeza ko bazizihiza umunsi Mukuru wa Noheli nk’ibisanzwe.
Ni isezerano atashyize mu bikorwa kuko mbere ya Noheli yatangaje ingamba zikakaye zo kwirinda Covid-19 zitashoboraga kubangikana no kwizihiza Noheli.
Muribuka ko hagati mu mwaka ushize wa 2020, Leta ya Boris Johnson yashishikarije abaturage badakingiwe kujya mu tubari n’amaresitora, yewe yanabashyiriyeho ibisa n’ibihembo ngo bakunde babikore.
Kwiyongera kw’abandura ariko, Boris avuga ko ari ibintu byari byitezwe, ko bidatangaje. Mbere, kwiyongera k’ubwandu kwaganishaga ku gukaza ingamba z’ubwirinzi.
