Umunya-Serbia Zlatko Krmpotić watoje APR FC mu 2019, yagizwe umutoza mushya wa Yanga SC yo muri Tanzania, ikinamo kapiteni w’ikipe y’Igihugu ‘Amavubi’, Haruna Niyonzima.
Yanga SC yari imaze ukwezi nta mutoza ifite nyuma yo gutandukana n’Umubuligi Luc Eymael wirukanywe ashinjwa irondaruhu mu mpera za Nyakanga.
Muri iki cyumweru, iyi kipe yo muri Tanzania yari yatangaje ko Umurundi Kaze Cédric wari guhabwa akazi, atakigizwe umutoza wayo kubera ibibazo yagize mu muryango we kandi ikaba itamutegereza.
Ibinyujije ku mbuga nkoranyambaga zayo, Yanga SC yemeje ko Umunya-Serbia Zlatko Krmpotić w’imyaka 62, ari we mutoza mushya.
Biteganyijwe ko Zlatko Krmpotić azagera muri Tanzania ku wa Gatandatu, akerekanwa hamwe n’abakinnyi bashya ku Cyumweru.
Zlatko Krmpotić yerekeje muri Tanzania nyuma y’umwaka umwe avuye mu Rwanda, aho yatoje APR FC amezi atanu uhereye muri Mutarama 2019, ariko nta gikombe yayihesheje.
Uyu mugabo waherukaga kwirukanwa na Polokwane City yo muri Afurika y’Epfo mu Ugushyingo 2019, yatoje amakipe arimo TP Mazembe yo muri Repubulika Iharanira Demokarasi ya Congo na Zesco United yo muri Zambia.
Uretse muri TP Mazembe yabaye umutoza wungirije mu 2015, andi makipe 19 yose yanyuzemo mu gihe cy’imyaka 26 yari umutoza mukuru.
Isooko: Igihe
