Haba harimo kwibeshya kwinshi cyangwa kwirengagiza uvuze iterambere ry’umuziki wa Tanzania ukibagirwa izina rya Babu Tale wakunze cyane indirimbo ya Davis D.
Nyuma y’amezi icyenda Ifarasi iri hanze, ubanza ari bwo Babu Tale yari ayibonye. Ntiyahishe amarangamutima ye, yahise agaragaza urukundo yayikunze.
Kuri Instagram, uyu mugabo uri mu bashinze label ya Wasafi Classic Baby (WCB) ibarizwamo Diamond Platnumz, yanditse ati “Dogo hata simjui ila hii ngoma imenivutia leo”
Bisobanuye ngo, “Uyu mwana (Davis D) sinanamuzi ariko iyi ndirimbo yankomye uyu munsi.”
Kuvuga ko atazi nyir’iyi ndirimbo byatumye umunyamakuru Guterman wa Isango Star amubwira, ati, “Ni umuhungu wacu wo mu Rwanda”
Yunzemo ati, “Davis D wanamushoramo imari, ni ikintu utazigera wicuza.”
Abanyarwanda batandukanye barimo abanyamakuru nka Luckman Nzeyimana, Yago, MC Nario, Ally Soudy, bagaragaje kwishimira kuba Babu Tale yapostinze iyi ndirimbo.
Gupostinga indirimbo ya Davis D bifite icyo bisobanuye ku kumwongerera umubare w’abafana muri Tanzania, igihugu gituwe n’abaturage basaga Miliyoni 50.
Ni no kumumenyekanisha ku Batanzania batari abafana b’umuziki gusa kuko Babu Tale ari n’Umudepite uhagarariye agace ka Morogoro y’Amajyepfo.
Hamisi Shaban Taletale wamamaye ku izina rya Babu Tale, ari mu Nteko Ishinga Amategeko kuva mu Gushyingo 2020, ku Itike y’Ishyaka riri ku butegetsi rya CCM.
Yazamuye impano z’abahanzi nka Diamond Platnumz, Rayvanny, Madee na Dogo Janja warongoye Irene Uwoya wahoze ari umugore wa nyakwigendera Ndikumana Katauti.
Kuri Bukuru Jean Damascene, umubyeyi wa Davis D, kuba indirimbo y’umwana we yapostingwa na Babu Tale ni ishema ku bahanzi nyarwanda.
Yabwiye Popote.rw ati, “Njyewe numvise umuntu yabanza gushima. Mu by’ukuri igikorwa cyiza cy’uriya muntu ukomeye witaye kureba indirimbo y’umuhungu wanjye, numva ari icyubahiro ku bahanzi nyarwanda, by’umwihariko ni byiza kuba yatoranyije indirimbo y’umusore wanjye.”
Ni n’ikimenyetso ko umuziki nyarwanda utakiri uwo mu Rwanda gusa ahubwo usigaye ukunzwe no mu mahanga kubera ingufu ziwushyirwamo nk’uko akomeza abisobanura.
Mu myaka ishize Bukuru yashatse kujyana umuhungu we muri Wasafi ngo afashwe kuzamura urwego rw’imiririmbire ye, ni icyifuzo kitarashyirwa mu bikorwa.
Kuri Bukuru, Wasafi ni label umuhanzi wese wo muri aka Karere yakwifuza gukorana na yo, ariko kuri ubu ni byiza ko Davis D ashatse kujyayo yasanga izina rye rifite uko rizwi.
Ati, “Wasafi ni inzu y’umuziki ikomeye, mbere twumvaga twahajya tuyoboza ubu kuba tubonye umwenge wo kwinjiriramo, ni inzira nziza yo kunyurayo tukanamubwira tuti uyu ni we Davis D, tukagirana umubano bikunze, nta muntu utakwifuza gukorana no muri Wasafi, bwaba ubuhanga mu kuririmba n’ubutunzi barabufite, twumva byaba bibaye iterambere, nta muntu wanga kuzamuka cyangwa kuzamurwa.”
Abifashijwemo na Babu Tale, Rayvanny yabaye umuhanzi wa mbere wo muri Tanzania watwaye International Best Viewers’s Choice Award mu bihembo bya BET muri 2017.
Ni na ko byagenze kuri Diamond Platnumz umaze kwegukana ibihembo iryaguye birimo ibya MTV Europe Music Awards bibiri byubashywe yatwaye mu mwaka wa 2015.
Reba indirimbo iheruka ya Icyishaka David (Davis D) yasohoye avuye mu gihome mu mezi abiri ashize.
